ӨСКЕМЕН. Наурыздың 11-і. BNews.kz. – Түтеген боранда Шығыс Қазақстанда құтқарушылар адамдарды қар құрсауынан алып шығуды жалғастыруда, деп хабарлайды ШҚО ТЖД баспасөз қызметі.

Аталған ведомстваның баспасөз қызметінің мәліметтері бойынша, құтқарушылар өткен тәулікте Шығыс Қазақстан облысының үш ауданында – Аягөз, Жайсан және Көкпекті аудандарында арнайы құтқару операцияларын жүргізді. Шілікті ауылынан он бес шақырым қашықтықтағы автомобиль жолында қалың жауған қар мен қатты желдің салдарынан алай-дүлей боран соғып, бірнеше көлік адамдарымен қарға кептеліп қалған.  Аягөз гарнизоны әскери бөлімшесінің қызметкерлері қар құрсауынан жиырма адамды босатты.